ភ្នំពេញ៖ អភិបាលរងខណ្ឌព្រែកព្នៅ លោក ហួរ ហួត លើកឡើងក្នុងបណ្តាញសង្គមដោយស្នើកុំឱ្យមានការបន្ទោស បំបាក់ទឹកចិត្តកីឡាករកម្ពុជា ក្រោយលទ្ធផលប្រកួតបាល់ទាត់បុរសក្រោម ២២ឆ្នាំ កម្ពុជាចាញ់មីយ៉ាន់ម៉ា ២-០។
សាររបស់លោក ហួរ ហួត នៅយប់ថ្ងៃទី៧ ខែឧសភា ឆ្នាំ២០២៣ ក្រោយបញ្ចប់ការប្រកួតបាល់ទាត់បុរស ក្នុងព្រឹត្តិការណ៍ស៊ីហ្គេមឆ្នាំ២០២៣ ក៏បានបញ្ជាក់ដែរថាមិនថាកីឡា ឬការប្រកួតណាមួយតែងតែមានចាញ់-ឈ្នះ ប្រសិនបើទទួលជ័យជំនះនោះត្រូវខិតខំបន្ថែមបន្ត ប៉ុន្តែបើចាញ់ត្រូវទុកជាបទពិសោធន៍ ហើយត្រូវខិតខំបន្តដូចគ្នា។
លោកថា៖ «កីឡា៖ចាញ់ឈ្នះគឺជារឿងសត្យានុម័ត! បើឈ្នះ គឺជាជោគជ័យហើយក៏ខិតខំបន្ត! តែបើចាញ់គឺជាបទពិសោធន៍ហើយក៏ខិតខំបន្តដូចគ្នា! កុំបន្ទោសបំបាក់ទឹកចិត្តកីឡាករជាតិយើង»។
គួរឱ្យដឹងដែរថា តារាងបច្ចុប្បន្នភាពមេដាយនៃព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ នៅកម្ពុជា គិតត្រឹមម៉ោង១១:១១នាទី ថ្ងៃទី៨ ខែឧសភា ឆ្នាំ២០២៣នេះ កម្ពុជាទទួលបានមេដាយមាសសរុប ៣២មេដាយមាសរួចហើយ ដែលកំពុងឈរនៅក្នុងចំណាត់ថ្នាក់លេខរៀងទី១៕
